Sabhi Ko Apna Samjhta Hon Kya Howa Hai Mujhay by (آشفتہ چنگیزی)

آشفتہ چنگیزی

Sabhi Ko Apna Samjhta Hon Kya Howa Hai Mujhay

سبھی کو اپنا سمجھتا ہوں کیا ہوا ہے مجھے

بچھڑ کے تجھ سے عجب روگ لگ گیا ہے مجھے

جو مڑ کے دیکھا تو ہو جائے گا بدن پتھر

کہانیوں میں سنا تھا سو بھوگنا ہے مجھے

میں تجھ کو بھول نہ پایا یہی غنیمت ہے

یہاں تو اس کا بھی امکان لگ رہا ہے مجھے

میں سرد جنگ کی عادت نہ ڈال پاؤں گا

کوئی محاذ پہ واپس بلا رہا ہے مجھے

سڑک پہ چلتے ہوئے آنکھیں بند رکھتا ہوں

ترے جمال کا ایسا مزہ پڑا ہے مجھے

ابھی تلک تو کوئی واپسی کی راہ نہ تھی

کل ایک راہ گزر کا پتہ لگا ہے مجھے

آشفتہ چنگیزی

Ronay Ko Bohat Roye Bohat Aah O Fghan Ki by (آشفتہ چنگیزی)

آشفتہ چنگیزی

Ronay Ko Bohat Roye Bohat Aah O Fghan Ki

رونے کو بہت روئے بہت آہ و فغاں کی

کٹتی نہیں زنجیر مگر سود و زیاں کی

آئیں جو یہاں اہل خرد سوچ کے آئیں

اس شہر سے ملتی ہیں حدیں شہر گماں کی

کرتے ہیں طواف آج وہ خود اپنے گھروں کا

جو سیر کو نکلے تھے کبھی سارے جہاں کی

اس دشت کے انجام پہ پہلے سے نظر تھی

تاثیر سمجھتے تھے ہم آواز سگاں کی

الزام لگاتا ہے یہی ہم پہ زمانہ

تصویر بناتے ہیں کسی اور جہاں کی

پہلے ہی کہا کرتے تھے مت غور سے دیکھو

ہر بات نرالی ہے یہاں دیدہ وراں کی

آشفتہؔ اب اس شخص سے کیا خاک نباہیں

جو بات سمجھتا ہی نہیں دل کی زباں کی

آشفتہ چنگیزی

Tabeer Is Ki Kya Hai Dhuwan Daikhta Hon Mein by (آشفتہ چنگیزی)

آشفتہ چنگیزی

Tabeer Is Ki Kya Hai Dhuwan Daikhta Hon Mein

تعبیر اس کی کیا ہے دھواں دیکھتا ہوں میں

اک دریا کچھ دنوں سے رواں دیکھتا ہوں میں

اب کے بھی رائیگاں گئیں صحرا نوردیاں

پھر تیری رہ گزر کے نشاں دیکھتا ہوں میں

یہ سچ ہے ایک جست میں ہے فاصلہ تمام

لیکن ادھر بھی شہر گماں دیکھتا ہوں میں

ہے روشنی ہی روشنی منظر نہیں کوئی

سورج لٹک رہے ہیں جہاں دیکھتا ہوں میں

آیا جو اس حصار میں نکلا نہ پھر کبھی

کچھ ڈوبتے ابھرتے مکاں دیکھتا ہوں میں

کھائے گی اب کے بار بھی آشفتگی فریب

صید طلسم شعلہ رخاں دیکھتا ہوں میں

آشفتہ چنگیزی

Thikanay Yun To Hazaron Tre Jahan Mein Thay by (آشفتہ چنگیزی)

آشفتہ چنگیزی

Thikanay Yun To Hazaron Tre Jahan Mein Thay

ٹھکانے یوں تو ہزاروں ترے جہان میں تھے

کوئی صدا ہمیں روکے گی اس گمان میں تھے

عجیب بستی تھی چہرے تو اپنے جیسے تھے

مگر صحیفے کسی اجنبی زبان میں تھے

بہت خوشی ہوئی ترکش کے خالی ہونے پر

ذرا جو غور کیا تیر سب کمان میں تھے

علاج ڈھونڈھ نکالیں گے اپنی وحشت کا

جنوں نواز ابھی تک اسی گمان میں تھے

ہم ایک ایسی جگہ جا کے لوٹ کیوں آئے

جہاں سنا ہے کہ سب آخری زمان میں تھے

آشفتہ چنگیزی

Tamam Jalna Jalana Fasana Hota Hoa by (عرفان صدیقی)

       عرفان صدیقی

Tamam Jalna Jalana Fasana Hota Hoa

تمام جلنا جلانا فسانہ ہوتا ہوا

چراغ لمبے سفر پر روانہ ہوتا ہوا

عجب گداز پرندے بدن میں اڑتے ہوئے

اسے گلے سے لگائے زمانہ ہوتا ہوا

ہری زمین سلگنے لگی تو راز کھلا

کہ جل گیا وہ شجر شامیانہ ہوتا ہوا

نظر میں ٹھہری ہوئی ایک روشنی کی لکیر

افق پہ سایۂ شب بیکرانہ ہوتا ہوا

رقابتیں مرا عہدہ بحال کرتی ہوئی

میں جان دینے کے فن میں یگانہ ہوتا ہوا

عرفان صدیقی

Yeh Shehr Zaat Bohat Hai Agar Banaya Jaye by (عرفان صدیقی)

عرفان صدیقی

یہ شہر ذات بہت ہے اگر بنایا جائے

یہ شہر ذات بہت ہے اگر بنایا جائے

تو کائنات کو کیوں درد سر بنایا جائے

ذرا سی دیر کو رک کر کسی جزیرے پر

سمندروں کا سفر مختصر بنایا جائے

اب ایک خیمہ لگے دشمنوں کی بستی میں

دعائے شب کو نشان سحر بنایا جائے

یہی کٹے ہوئے بازو علم کیے جائیں

یہی پھٹا ہوا سینہ سپر بنایا جائے

سنا یہ ہے کہ وہ دریا اتر گیا آخر

تو آؤ پھر اسی ریتی پہ گھر بنایا جائے

عجب مصاف سکوت و سخن میں جاری ہے

کسے وسیلۂ عرض ہنر بنایا جائے